The Universal House of Justice

Ridván 2022

To the Bahá’ís of the World

Dearly loved Friends,

Kuo tāpuni ‘a e ta’u ‘e taha ‘o e ngaahi teuteu mo e fakamā’opo’opó, kae’uma’ā ‘a e ngaahi ngāue tōtoivi, na’e makehe ‘i hono ngāue’i ‘e he si’i ngaahi kaume’á ke

faka’ilonga’i’aki ‘a e senituli ta’u ‘o e Hā’ele Hake ‘a ‘Abdu’l-Bahá, ‘o kau atu mo e folau ki ai ‘a e kau fakafofongá ke kau ‘i hono fakamanatua ‘a e kātoanga makehe ‘o Iá ‘i he Fonua Tapú. ‘I he ngaahi ngāué ni, ko e ngaahi ue’ia fakalaumālie na’e hoko mei he mo’ui ‘o

‘Abdu’l-Bahá na’e ongo’i ‘e he ngaahi laumālie lahi ‘o ‘ikai fakangatangata pē ki he kau Bahá’í. Ko ‘Ene tokangaekina ‘a e mēmipa kotoa ‘o e fāmili ‘o e tangatá, ‘a ‘Ene ngāue fakafaiakó, ‘a ‘Ene faka’ai’ai ‘a e ngaahi ngāue ki he fakalakalaka ‘o e akó mo e lelei fakasōsialé, ‘a ‘Ene lukuluku mahu’inga ki he ngaahi ha’ofanga tālanga ‘i he Hahaké mo e Hihifó, ‘a ‘Ene fakalotolahi fonu ‘i he ‘ofa ‘a e ngaahi ngāue ki hono langa ‘o e ngaahi Fale

Fai’anga Lotú, ‘a ‘Ene fakafuo ‘a e fōtunga ‘o e foungapule’i faka-Bahá’í, ‘a ‘Ene tanumaki ‘o e tu’unga kehekehe ‘o e mo’ui fakakoló – ‘a e kotoa ‘o e ngaahi tafa’aki fepoupouaki ‘i he’Ene mo’uí na’a ne fakatapa mai ‘a ‘Ene tu’u fakamatu’u mo lī’oa kakato ki he ngāue fakatamaio’eiki ma’ae ‘Otuá kae’uma’ā ‘a e fa’ahinga ‘o e tangatá. Mahulu atu ‘i he’Ene hoko ko e sīpinga mahu’inga ‘o e mafai fakamōlalé pea mo taupeupe atu ‘i he ‘ilo loloto fakalaumālié, ka na’e hoko ‘a ‘Abdu’l-Bahá ko e fakatafenga haohaoa na’e tukuange mai ai ‘a e ngaahi ivi mālohi ‘o e Fakahā ‘a Bahá’u’lláh ke ne ue’ia ai ‘a e māmaní. Ke mahino’i ange ‘a e ivi mālohi ‘o e langa sosaietí ‘oku ma’u ‘e he Lotú ni, he’ikai te tau toe vakai mama’o atu ka ko e ngaahi lavame’a ko ia ‘a ‘Abdu’l-Bahá lolotonga ‘a’Ene ngāue fakamisioná pea mo e ivi liuanga ‘o e ngaahi takiekina na’e tafe ta’emamotu mai he’Ene pení. Ko e lahi taha ‘i he ngaahi fakalakalaka fakaofó na’e fakahoko ‘e he ngaahi komiunitī Bahá’í lolotongá – ‘a ē na’a tau vakai‘i ‘i he pōpoaki Lisivani faka’osí – na’e kamata’i ‘a e ngaahi ngāue ko iá, ngaahi faitu’utu’uní pea mo e ngaahi tatakí ‘e ‘Abdu’l-Bahá.

Sio ange ki he taau ko ia, ‘a e ngāue fakatokolahi ‘a e komiunitī Bahá’í ki hono fakalangilangi’i ko ia ‘o e taha Sīpinga haohaoá ‘oku ne fa’u ai ‘a e talateu ki he teu kamata’i ‘o ha fu’u ngāue lahi ‘e tukuange atu ai ‘a e ivi mālohi ‘o e langa sosaietí ‘o e Lotú ni ‘i he ngaahi me’afua ‘oku toe lahi ange fau. Ko e ngaahi ‘ēlia ‘o e ngāué ‘i loto ‘i he ngaahi ngāue ‘o e Palani Ta’u Hivá, kae’uma’ā ‘a e ngaahi Palani hokohoko lolotongá, ‘oku tataki pe ke nau fakakakato ‘a e tefito’i taumu’a fakalukufua pē ko iá. Pea ko e taumu’a pe ia ‘o e ngaahi konifelenisi laka hake he 10,000 tupu ‘a hono fakahoko ‘i he kolopē ki hono kamata’i ‘a e fu’u ngāue fakalaumālie ma’ongo’onga ko ení. ‘Oku ‘amanaki foki mei he ngaahi konifelenisi ko ení, ke ne talitali ‘a e tokolahi taʻefakatataua ʻo kinautolu na’e kau maí, ‘o fakataha’i mai ‘o ‘ikai ko e kau Bahá’í pē ka ko e tokolahi ko e kau poupou ofi ki he lelei ‘o e fa’ahinga ‘o e tangatá ‘o nau fevahevahe’aki ai ‘a e fakaʻānaua ke ohi mai ʻa e uouangatahá pea mo ha māmani lelei ange. Ko ‘enau lotofakapapaú mo e ongoʻi mālohi ʻo e taumuʻá na’e fakatapa ia ‘i he laumālie na’e fakalele’aki ‘a e ngaahi ha’ofanga ko iá, ‘a ia na’á ne faka’ai’ai ‘a kinautolu na’e kau mai ‘i he ngaahi fealealea’aki longomo’uí ke nau lukuluku ki ha vīsone fakatokolahi na’e kumia ‘i he ngaahi ha’ofanga fiefia ko iá. Ko ia ʻoku tau vakai loto vēkeveke atu ki he ngaahi meʻa ʻe ʻomi ʻe he ngaahi māhina mo e ngaahi taʻu ka hokó.

Hili ‘a’emau fakaa’u atu ‘a’emau pōpoaki ‘o e ‘aho 30 Tīsema 2021 ki he Konifelenisi ‘o e kau Kauniselā, ngaahi Fakataha’anga Fakalaumālie Fakafonuá pea mo e ngaahi Kōsilio Fakavahefonua Faka-Bahá’í ‘i he’enau fakafuofuaʻi fakamatoato ʻa e ngaahi faingamālie ke fakalahi ʻa e founga ʻo e tupulaki ‘i he ngaahi kalasitā ‘i he’enau feitu’u takitaha lolotonga ‘a e Palani Ta’u Hivá. ‘Oku mau ongo’i ‘e ‘aonga, ʻi he taumuʻa ke fakaleleiʻi ʻa e fakalakalaka naʻe fai ʻi ha vahaʻa taimi, ke vakai ki he Palani ‘e fakahokó ‘i he fōtunga ‘e ua ‘o e ta’u ‘e fā pea mo e ta’u ‘e nima ‘a hona lōloá, pea ‘oku fakaafe’i atu ai ‘a e ngaahi Fakataha’anga Fakalaumālie Fakafonuá ke nau fakakaukau ki he ngaahi fakalakalaka ʻoku nau ʻamanaki ke mamata ki ai ʻi honau ngaahi komiunitī takitaha ‘i he Lisivani ‘o e 2026 pea mo e Lisivani ‘o e 2031. ‘Oku kau foki ʻi he ngāue ko ʻení hano toe vakaiʻi ʻo e ngaahi fakangatangata fakakalasitā, pea ko e ola ʻo e ngaahi liliu ko ʻení ko e lahi fakakātoá ʻo e ngaahi kalasitā ʻi mamaní kuo hiki hake ‘aki ‘a e kuata ‘o a’u ʻeni ki he 22,000. ʻI hono fakamā’opo’opo ʻo e ngaahi talamuʻaki ne maʻú, ʻoku fakafuofuaʻi, ʻi he fakaʻosinga ʻo e Palaní, ʻe ʻi ai ‘a e polokalama ʻo e tupú tene a’usia ha tuʻunga ʻe niʻihi ʻo e fakalakalaká ʻo a’u ki he 14,000 ʻi he ngaahi kalasitā ko ʻeni. Pea mei he ni’ihi ko iá, ko e lahi ‘o e ngaahi polokalama ‘o e tupú te ne lava ‘o a’usia ‘a e tu’unga longomo’uí ‘e kaka hake ki he 11,000 ‘i he vaa’i taimi tatau. Pea mei ai, ‘oku fakafuofua ko e lahi ‘o e ngaahi kalasitā kuó ne ‘osi a’usia ‘a e maka maile hono tolú ‘e lahi hake ‘i he 5000 tupu ‘i he’ene a’u ki he ta’u 2031. ʻOku ʻikai toe fehuʻia, ke a’usia ha nga’unu pehē te ne fiema’u ha fu’u ngāue lahi fau ‘i he vaa’i taimi kakato ko ia ‘o e Palaní. Ka ʻoku tau ʻilo’i heni ko e ngaahi fakaʻamu taau ʻeni ke tau fāifeinga ki ai, he ʻoku nau fakafofongaʻi ha taumu’a ‘oku lahi mo fakamatoato ʻo e meʻa ʻe lava ke aʻusia.

ʻOku fakamatalaʻi atu heni. Ko e ngaahi taumu’a ko ení na’e ‘ikai mei lava ‘o fakatokanga’i totonu kapau na’e ‘ikai ke ‘i ai ‘a e fakalakalaka lahi ‘i he ngaahi sinopule’i faitu’utu’uní mo e ngaahi uma ngāué, ke ne fakanaunau kinautolu mo ha ivi malava mahulu atu fau ki hono mapule’i lelei ‘a e ngaahi ngāue ‘o e komiunitī ‘a ē kuo liuliuanga ‘a ‘ene tupu vavé, ‘o fakakau fakatokolahi mai ‘a e ngaahi laumālie fieongó ‘oku kei tupu tokolahí. He'ikai malava ke a’usia ha tupu lahi pehé ni kapau ko e faka’amu ke akó – ke ngāue, ke fakama’opo’opó, ke vahevahe ‘a e mahinó, pea mo ako ‘a e ngaahi taukeí ‘oku fotu hake mei he ngaahi feitu’u kehe – na’e ‘ikai ohi hake ‘i he ngaahi tu’unga kotoa pē, ‘o a’u atu ai pe ki he lēvolo fakakoló. Pea ʻe ʻikai faʻa hoko ʻa e ngāue ʻoku fokotuʻu mai ʻe ha faʻahinga fakafuofua pehē leva, kapau naʻe ʻikai ha founga pau ‘oku hokohoko maau ki he ngāue fakafaiako mo e fakalakalaka’i ʻa e ivi ngāué ʻi he māmani Bahá’í. Na’e hoko kotoa eni ke ne ‘omi ‘a e fakalakalaka lahi ‘i he mahino ‘a e komiunitī Bahá’í ‘i hono ʻiloʻi hono tuʻungá mo ‘ene taumuʻá. Ko ha loto fakapapau ke lava ‘o vakai ki tu’a ‘i he founga ngāue ‘o e langa komiunitī kuo ‘osi fokotuʻu ia ko e anga fakafonua ʻi ha ngaahi feituʻu lahi; ‘o fakalakalaka ia ‘i he taimí ni, ‘o tupu tokolahi ange ‘i he ngaahi tukui koló, ʻo hoko ko ha ongoʻi moʻoni ʻo e fatongia ki he fakalakalaka fakalaumālie mo fakatu’asino ʻa ha ngaahi kulupu tokolahi mo lalahi ange ʻi he sosaietí, ʻo mahulu hake ia ʻi he kāingalotu ʻo e komiunitī Bahá’í pē. Ko e ngaahi feinga ngāue ‘o e kaungāme’á ki he langa komiunitī, ‘o kau atu ki he ngāue fakalakalaka fakasōsialé, mo lukuluku ki he ngaahi tālanga mahu’inga ‘o e sosaietí, ‘o fakama’unga ki hono tokonia ‘o fa’ahinga ‘o e tangatá ‘o nau kau atu ki he ngāue

fakamamani lahi, ‘o ha’i fakataha ‘i he fa’unga ngāue tatau, ki hono tokonia ‘a e fa’ahinga ‘o e tangatá ke fokotu’u ‘a e ngaahi ngāue ‘oku fakava’e fakalaumālie. Ko e mahu’inga ‘o e ngaahi fakalakalaka na’a mau fakamatala’í, ‘o a’usia ‘a e tu’unga ko ení ‘i he ta’u ‘e teau hili hono fokotu’u ‘a e Foungapule’i Fokotu’utu’u maaú, he’ikai lava ke ta’efakatokanga’i. ʻI he fakalakalaka tuʻunga makehe ko ia ‘o e ivi malavá kuo a’usia ‘i he taʻu ʻe uangofulu kuo maliu atú – ‘a ē na’e malava ai ‘a e māmani Bahá’í ke ne vakai’i ‘a’ene ngaahi ngāué ‘o fakatatau mo e ivi mālohi ‘o e langa sosaieti ‘o e Lotú – ‘oku tau mamata ki ha fakamoʻoni ʻoku ʻikai toe fehuʻia ki he Lotu ‘a e ‘Otuá ‘a ‘ene hū atu ki he ‘ēpoki hono onó ‘o e Kuonga ‘o e Langá. Ne mau fanongonongo ai ‘i he Lisivani kuo ‘osí ʻa e mafola lahi ʻo e kau mai ʻa e tokolahi ‘i he ngaahi ngāue faka-Bahá’í, ‘o fakamo’ui’aki ‘i he tuí, pea mo hono ma’u ‘a e ngaahi poto’i ngāué mo e ngaahi ivi malava ke ngāue fakatamaio’eiki ‘i hono ngaahi koló ‘o ne faka’ilonga’i ai ‘a e kamata ‘o e ‘ēpoki hono tolu ‘o e Palani Fakalangi ‘o e Takí; ko ia ai, ko e Palani Ta’u Tahá, ‘i he’ene kamata mai mo ‘ene tāpuní, kuó ne maaka’i ai ha fakalakalaka fakahisitōlia ‘e he kau muimui ‘o e kau faivelengá. Pea ʻi he kamataʻanga ʻo ha ngāue foʻou mo kāfakafa, ʻoku tuʻu mateuteu ʻa e sino faaitaha ko ʻeni ʻo e kau tuí ke pukenimā ʻa e ngaahi faingamālie ‘e ala malavá ʻi muʻa ai.

Ko ha konga ʻiloa ʻo e ʻēpoki ʻoku tāpuni he taimi ní ko hono langa ʻo e ngaahi Fale Fai’anga Lotu fakakonitineniti fakaʻosí pea mo hono kamata’i ‘o e ngaahi Fale Fai’anga Lotu ‘i he tu’unga fakafonuá mo e fakakoló. Kuo lahi ‘a e ngaahi ako kuo ma’u, ‘e he kau Bahá’í ‘i māmani kotoa, felāve’i pea mo e kaveinga ‘o e Mashriqu’l-Adhkár pea mo e faaitaha ‘i he lotú mo e ngāue fakatamaio’eikí ‘oku ne fakafofonga’í. Lolotonga ‘a e ‘ēpoki hono ono ‘o e Kuonga ‘o e Langá, ‘e toe lahi ange ‘a e ngaahi ako ‘e ma’u ‘i he ngaahi kauhala ‘e tataki ‘i he ngaahi fakalakalaka ‘o e ngaahi komiunitī ‘i he ngaahi feohi’anga fakalaumālie ‘oku longomo’uí – pea mo e ngāue fakatamaio’eiki tene ue’iá – ke lava ‘o fokotu’u ai ha Mashriqu’l-Adhkár. Kuo kamata ‘a e ngaahi fealealea’aki mo e ngaahi Fakataha’anga Fakalaumālie Fakafonuá, pea ‘i hene hokohoko atū, te mau hokohoko fanongonongo atu ‘a e ngaahi feitu’u ‘e fokotu’u ai ‘a e ngaahi Fale Fai’anga Lotu ‘o e Bahá’í ‘i he ngaahi ta’u ka hoko maí.

ʻOku tuifio ʻemau fiefia ʻi he mamata ki he fakalakalaka ‘a e Komiunitī ʻo e Huafa Lahi Tahá mei he mālohi ki he mālohí pea mo ‘emau mamahi lahi ʻi he mamata ki he vilitaki ʻa e ngaahi tūkungá mo e fepakipaki ʻi he māmaní ʻa ia ʻokú ne fakatupu ʻa e mamahí mo e faingataʻaʻiá lahi – kae tautau tefito, eni ʻi heʻemau mamata ki he toe kamata fo’ou ʻa e ngaahi mālohi fakaʻauha kuó ne veuveuki ‘a e ngaahi tu’unga fakavahaʻapuleʻanga ‘i he fehangahangai ‘a honau kakaí mo e ngaahi tūkunga fakalilifu mo’oni. ‘Oku mau ‘ilo’i lelei mo loto fakapapau, ‘i hono toutou fakahā atu ‘e he ngaahi komiunitī Bahá’í ‘i he ngaahi tūkunga kotoa pē, ‘a e lī’oa ‘a e kau muimui ‘a Bahá’u’lláh ‘i hono ‘oatu ‘a e fakanonga mo e tokoni ki he ni’ihi kotoa pē ‘oku nau feohi mo iá, ʻo tatau ai pē pe ko e hā e lahi ‘o e faingata’a ʻo e tuʻunga ne nau ʻi aí. Kae ‘oleva pē kuo kau kotoa ‘a e fa’ahinga ‘o e tangatá ke fokotuʻu ‘a ‘ene ngaahi ngāué ʻi he ngaahi makatuʻunga ʻo e fakamaau totonú mo e moʻoní, ‘a ia ko hono mo’oní, kuo pau ia ke ne luelue atu mei he faingata’a ‘e taha ki he taha. ‘Oku mau lotua ai, na’a hoko ‘a e taulahi ko eni na’e toki kamata ‘i ‘Iulopé ko ha ako ki he kaha’ú, ke hoko ko ha fakamanatu fakavavevave ‘a e vaa’i hala ke kumi ki ai ‘a e māmaní kapau ‘okú ne fiema’u ke a’usia ha melino ‘oku tolonga mo mo’oni. Ko e ngaahi tefito’i akonaki na’e fakamahino’i ‘e Bahá’u’lláh ki he kau ha’a tu’í mo e kau palesiteni ‘a Hono taimí, pea mo e fatongia mafatukituki na’a Ne ui ki ai ‘a e kau taki ‘o e ngaahi fonuá ‘o e kuohilí mo e lolotongá ni, mahalo ʻoku toe mahuʻinga mo vivili ange ia he ʻahó ni ʻi he fuofua taimi naʻe hiki aí ‘e he‘Ene Pení. Ka ki he kau Bahá’í, ko e fakalakalaka taʻe-malava ke fakamatalaʻi ʻo e Palani Lahi Ange ʻa e ʻOtuá – ‘i hono ʻomi ai e ngaahi faingataʻá mo e moveuveú, ka ʻokú ne ueʻia ʻa e faʻahinga ʻo e tangatá ki he fakamaau totonú, melinó, mo e uouangatahá – ‘a ia ko e kaveinga ia ‘i loto ‘i he Palani Si’i Ange ‘a e ‘Otuá, ko ha fatongia tefito ia ‘a e kau tui kotoa pe ke femo’ueikina ki ai, kuo fofola mai. ʻOku hanga ai ʻe he tuʻunga faingataʻa ʻo e sōsaietí ʻi he ngaahi ʻahó ni ʻo ʻai ke mahino mo vivili ʻaupito ʻa e fiemaʻu ke tukuange atu ‘a e ivi mālohi ‘o e langa sosaieti ‘o e Lotú ni. He ʻikai ke tau lava ʻo ʻamanaki ki ai he taimí ni, ka ‘e hokohoko atu ai pē ʻa e fakamamahiʻi ʻo e māmaní ʻe he ngaahi lulu faingata’a mo e moveuveú; ‘o ʻikai ha toe veiveiua ʻe hounga kiate koe ʻa e ʻuhinga ʻoku fai ai ʻa e lotu fakamātoato kotoa pe ʻoku tau foaki ki he fānau kotoa ʻa e ʻOtuá ke nau ma’u ha fakanonga mei he puputu’ú mo e faingata’a fakamamahí, pea ʻoku ō fakataha ia mo ha lotu fakamātoato ke ola lelei ʻa e ngāue fakatamaio’eiki vivili ʻoku ke fakahokó ma’ae Lotu ko eni ʻa e Pilinisi ʻo e Melinó.

‘I he ngaahi kalasitā kotoa pē ‘oku fakautuutu ai ‘a e tupu longomo’ui ‘o e ngaahi ngāue ‘o e Palaní, ‘oku tau vakai tonu ai ki he ngaahi ‘ulungaanga faka’ei’eiki ‘o e ngaahi komiunitī kuo nau fakalakalaká ‘o hangē ko ia na’e fakamatala’i atu ‘i he pōpoaki ‘o e ‘aho 30 ‘o Tīsema 2021. ‘I he fehangahangai ‘a e sosaietí pea mo e ngaahi tu’unga faingata’a kehekehe, ‘oku fiema’u ai ki he kau muimui ‘o e Hoihoifua Tupu’á ke nau hokohoko atu ‘a’enau makehe ‘i he ‘ulungaanga ‘o e kātekina ta’emamotú pea mo e ‘uhinga leleí, ki he’enau ‘ulungaanga taaú pea mo e talangofua ki he ngaahi akonakí, pea mo ‘enau anga’ofá, fakatalatalá, mo e fa’a kātakí ‘o nau fakatapa atu ia ‘i he’enau feinga ki he uouongatahá. ‘Oku tā tu’olahi, ‘i he makehe ‘a e ngaahi ‘ulungaanga mo e tō’onga ko ia ‘oku fakahā atu ‘e he kau tuí lolotonga ‘a e ngaahi vaa’i taimi faingata’a mo’oni, ‘oku ne faka’ai’ai ai ‘a e kakaí ke nau kumi ‘a e fale’i ‘o e kau Bahá’í ki ha ngaahi fakamatala, fale’i mo e tokoni, kae tautau tefito eni ki he taimi ‘oku tofanga ai ‘a e sōsaieti ‘i he ngaahi fakatu’utāmaki ta’e’amanekina. ‘I he vahevahe atu ko eni ‘a e ngaahi a’usiá ni, ‘oku tau ‘ilo’ilo ai ‘oku uesia ‘a e komiunitī Bahá’í ‘i he ngaahi ola kovi ‘o e ivi faka’auhá ‘i he’ene ngāue atu ki he māmaní. ‘I he taimi tatau pē, ‘oku mau ‘ilo’i ko e lahi ange ko ia ‘a e femo’uekina ‘a e ngaahi kaungāme’á ki hono talaki ‘a e Folofola ‘o e ‘Otuá, ko e mālohi ange ia ‘a e ngaahi ivi mālohi ‘o e fakafe’atungiá te nau fehangahangai mo iá, ‘o vave ni mai, mei he tuliki kotoa pē. Kuo pau ai ke nau tu’u fakamakatu’u ‘i honau ‘atamaí mo e laumālié mei he ngaahi tesi kotoa pē ‘e hokosia mai, telia naʻa uesia ʻe he ngaahi meʻá ni ʻa e angatonu ʻo ʻenau ngaahi ngāué. Ka ‘oku ‘osi ‘ilo’i ‘e he kau tuí ‘oku tatau ai pe ko e hā ‘a e fōtunga ‘o e ngaahi afā

‘o e ‘ahi’ahí ‘e hokosia mai ‘i he kaha’ú, ka ‘oku tatau pe ki he taha kotoa ‘a hono ngāue’i ‘a e ‘a’ake ‘o e Lotú. Na’á ne a’usia ‘a e ngaahi fakalakalaka lahi ‘o tatau ai pē ‘a e hako mo e faingata’a ‘a e ngaahi kaupeau na’á ne folaua maí. Kuo mahino mai ‘i he taimí ni ‘a e tafa’aki langifo’ou ke fakama’unga ki aí. Ko e ngaahi fakapapau ko ia ‘a e taha Māfimafí ko e matangi ia ki hono fakaivia ‘a ‘ene folaú pea mo tekeʻi vave ia ki he feituʻu ʻoku fakataumuʻa ki aí. Pea ko e Kovinānité ‘a hono fetu’u tataki’angá, ‘i hono tauhi ‘a e vaka toputapú ni ke ne tauhi ma’u ki hono ‘alungā. Fakatauange ki he kau hositē ‘o hēvaní ke tauafu atu ‘a e ngaahi tapuakí ma’ae taha kotoa pē ‘o e kau kauvaka ‘oku kau atu ‘i he folaú.

- The Universal House of Justice